Ninja – Teatro Ghazafelhos

'Ninja' é unha peza dirixida a público familiar que aborda o acoso escolar a través dunha historia chea de humor e de reflexións sobre o respecto, o apoio mutuo e a diversidade. A Tori, encántalle a cultura oriental: o karate, o Kung fu, o jiu-jitsu, as películas de Bruce Lee... O seu soño é ser unha ninja e adestra todos os días para pasar inadvertida. Nese proceso, descobre que no seu colexio hai moitas nenas e nenos que queren ser invisíbeis para deixar de sufrir acoso. Coa axuda do seu veciño, o señor Edelmiro, conseguirán dar visibilidade ao que está a acontecer e así mudar as tornas. A peza foi finalista a mellor proposta para público familiar nos Premios María Casares 2023.