MEMORIAS DUN CAN DE PALLEIRO – LÎLÂ TEATRO

Así é como transcorre un día na vida dun can, pero non dun can calquera. Trátase dun can moi especial que pertence a unha raza mítica, lendaria e con moito prestixio, a de Palleiro. Este can é Duncan de Palleiro, o Príncipe das Corredoiras. Duncan leva unha vida sinxela xunto ao seu amo Aurelio e cos seus amigos, veciñas e rabaños de sempre, nunha aldeiña ó abeiro dun monte espigo chamada Oubidos, un fermoso lugar que o fai sentir moi fachendoso. Duncan ama profundamente a todos os nenos e nenas, e alí onde vai leva consigo unha grandísima sorpresa que non deixará a ninguén indiferente. Amizade, Ledicia e Liberdade son as verbas que máis gustan a Duncan de Palleiro.