UN PAÍS EN MIL FOLIADAS – A BANDA DAS CRECHAS

A BANDA DAS CRECHAS é a faciana dun universo colectivo que comezamos a construir entre todos hai máis de trinta anos arredor da conversa, da arte, da música ao vivo, do amor polo propio e a curiosidade polo alleo. Un conxunto aberto, unha banda 2.0 na que músicos habituais e interpretes ocasionais se unen para manter viva a tradición, o son e a emoción da foliada. Este pasado novembro de 2022 celebrouse a foliada número 1.000, unha desas noites de cante e de baile nas que o pub compostelano Casa das Crechas fixo honra a súa historia converténdose, unha vez máis, no lugar de encontro que leva sendo dende mediados do século XIX.